காலநிலை மாற்றம், உணவுப் பாதுகாப்பு மற்றும் மனிதகுலத்தின் எதிர்காலம்

உலகம் இன்று ஒரு புதிய காலநிலை யுகத்திற்குள் நுழைந்துள்ளது. கடந்த சில ஆண்டுகளாக உலகின் பல பகுதிகளில் நிகழும் இயற்கைப் பேரிடர்கள் இனி “அசாதாரணமான” சம்பவங்களாகப் பார்க்கப்படுவதில்லை; மாறாக, அவை மனித வாழ்வின் புதிய யதார்த்தமாக மாறிவருகின்றன. பிரான்சில் ஏற்பட்ட காட்டுத்தீ காரணமாக நூறாயிரக்கணக்கான மக்கள் தங்கள் வீடுகளை விட்டு வெளியேற வேண்டிய நிலை ஏற்பட்டுள்ளது. ஸ்பெயினிலும் பல்லாயிரக்கணக்கானோர் பாதுகாப்பான இடங்களுக்கு இடம்பெயர்ந்துள்ளனர். இதேவேளை, பிரிட்டன் இந்த ஆண்டிலேயே நான்காவது கடுமையான வெப்ப அலையை எதிர்கொண்டுள்ளது. ஆண்டின் தொடக்கத்தில் ஏற்பட்ட அதீத வெப்பநிலையால், இயல்புக்கு மாறக வெப்பத்தினால ஆயிரத்திற்கும் மேற்பட்டோர் உயிரிழந்ததாக ஆய்வுகள் தெரிவிக்கின்றன.

இந்த நிகழ்வுகள் அனைத்தும் ஒன்றுக்கொன்று தொடர்பில்லாத தனித்தனி இயற்கைச் சம்பவங்கள் அல்ல. உலக காலநிலை அமைப்பில் ஏற்பட்டுள்ள ஆழமான மாற்றங்களின் அறிகுறிகளாகவே அவற்றைப் புரிந்துகொள்ள வேண்டும். இந்தப் பின்னணியில்தான், உலக காலநிலை ஆய்வாளர்கள் மீண்டும் உருவாகத் தொடங்கியுள்ள “எல் நினோ” (El Niño) என்ற காலநிலை நிகழ்வைப் பற்றி எச்சரிக்கை விடுத்துள்ளனர். இது அடுத்த சில மாதங்களில் உலகளாவிய வானிலை, விவசாயம், பொருளாதாரம் மற்றும் உணவுப் பாதுகாப்பில் தீவிரமான தாக்கங்களை ஏற்படுத்தக்கூடும் என அவர்கள் கூறுகின்றனர்.

எல் நினோ என்றால் என்ன? எல் நினோ என்பது பசிபிக் பெருங்கடலின் வெப்பமண்டலப் பகுதியில் கடல்மேற்பரப்பின் வெப்பநிலை இயல்பை விட அதிகரிப்பதால் உருவாகும் இயற்கையான காலநிலை நிகழ்வாகும். இது El Niño Southern Oscillation (ENSO) எனப்படும் பரந்த காலநிலைச் சுழற்சியின் ஒரு பகுதியாகும். சாதாரணமாக, பசிபிக் பெருங்கடலின் மேற்குப் பகுதியில் வெப்பமான நீரும், கிழக்குப் பகுதியில் குளிர்ந்த நீரும் காணப்படும். இந்த வெப்பநிலை வேறுபாடே உலகளாவிய காற்றோட்டம், பருவமழை மற்றும் காலநிலை அமைப்புகளை ஒழுங்குபடுத்துகிறது. ஆனால் எல் நினோ உருவாகும் போது இந்த இயற்கை சமநிலை சீர்குலைகிறது. கடலின் வெப்பநிலை அதிகரிப்பதன் காரணமாக காற்றோட்டம் மாறுகிறது; அதன் விளைவாக உலகின் பல பகுதிகளில் மழைப்பொழிவு, வெப்பநிலை மற்றும் வானிலை முறைகள் கணிசமாக மாறுகின்றன.

இந்த மாற்றங்கள் சில மாதங்கள் முதல் ஒரு ஆண்டுவரை நீடிக்கலாம். அதன் தாக்கம் உலகின் எல்லாப் பகுதிகளிலும் ஒரே மாதிரியாக இருக்காது. சில நாடுகளில் கடுமையான வறட்சி உருவாகும்; சில பகுதிகளில் வரலாறு காணாத வெள்ளப்பெருக்குகள் ஏற்படும்; வேறு சில இடங்களில் காட்டுத்தீ, வெப்ப அலை, புயல் மற்றும் சூறாவளிகள் அதிகரிக்கும். இதனால் எல் நினோ ஒரு கடல் நிகழ்வாக மட்டுமல்ல, உலகளாவிய சமூக மற்றும் பொருளாதார விளைவுகளை ஏற்படுத்தும் காலநிலைச் சுழற்சியாகவும் கருதப்படுகிறது.

எல் நினோ என்பது ஆயிரக்கணக்கான ஆண்டுகளாக இயற்கையாக நிகழ்ந்து வரும் ஒரு நிகழ்வு. ஆனால் இன்று அது உலகிற்கு மிகப் பெரிய அச்சுறுத்தலாக மாறியிருப்பதற்குக் காரணம், மனிதனால் உருவாக்கப்பட்ட காலநிலை மாற்றம் அதன் தாக்கத்தை மேலும் தீவிரப்படுத்துவதுதான். தொழில்துறை வளர்ச்சிக்குப் பிறகு நிலக்கரி, எண்ணெய் மற்றும் இயற்கை எரிவாயு போன்ற புதைபடிவ எரிபொருட்கள் அளவுக்கு மீறி பயன்படுத்தப்பட்டதால் வளிமண்டலத்தில் கார்பன் டையாக்சைடு உள்ளிட்ட பசுமைக் குடில் வாயுக்கள் அதிகரித்துள்ளன. இதன் விளைவாக பூமியின் சராசரி வெப்பநிலை தொடர்ந்து உயர்ந்து வருகிறது.

இந்த சூழலில் உருவாகும் எல் நினோ நிகழ்வுகள் கடந்த காலத்தை விட அதிக தீவிரமுடையதாக மாறுகின்றன என்று பல காலநிலை ஆய்வுகள் சுட்டிக்காட்டுகின்றன. கடந்த ஐம்பது ஆண்டுகளில் 1982–83, 1997–98 மற்றும் 2015–16 ஆகிய காலங்களில் ஏற்பட்ட “சூப்பர் எல் நினோ” நிகழ்வுகள் உலகின் பல பகுதிகளில் வெப்பநிலை சாதனைகளை முறியடித்ததுடன், கடுமையான வெள்ளம், வறட்சி, காட்டுத்தீ மற்றும் பெருமளவிலான பொருளாதார இழப்புகளையும் ஏற்படுத்தின. இயற்கையான ஒரு நிகழ்வு, மனிதனால் உருவாக்கப்பட்ட காலநிலை மாற்றத்துடன் இணையும் போது அதன் விளைவுகள் எவ்வளவு ஆபத்தானதாக மாறக்கூடும் என்பதற்கு இவை முக்கிய எடுத்துக்காட்டுகளாகும்.

எல் நினோவின் முதல் மற்றும் மிகப்பெரிய தாக்கம் விவசாயத் துறையில்தான் வெளிப்படுகிறது. உலகின் பெரும்பாலான உணவு உற்பத்தி பருவமழையைச் சார்ந்துள்ளது. மழை குறைந்தாலும் பயிர்கள் பாதிக்கப்படும்; அளவுக்கு அதிகமாக மழை பெய்தாலும் விளைச்சல் அழியும். 2023 ஆம் ஆண்டு ஏற்பட்ட எல் நினோவின் தாக்கத்தால் கிழக்கு மற்றும் தெற்கு ஆப்பிரிக்காவின் சில பகுதிகளில் மக்காச்சோள உற்பத்தி 70 சதவீதம் வரை குறைந்தது. ஆசியாவின் சில பகுதிகளில் அரிசி உற்பத்தி பாதிக்கப்பட்டது; லத்தீன் அமெரிக்காவின் பல பகுதிகளில் கடுமையான வறட்சி நிலவியது.

இன்றைய உலகமயமாக்கப்பட்ட பொருளாதாரத்தில் ஒரு நாட்டின் விவசாயப் பாதிப்பு அந்த நாட்டின் பிரச்சினையாக மட்டும் இருக்காது. ஒரு முக்கிய உற்பத்தி நாடு குறைவாக விளைவித்தால், உலகளாவிய உணவுச் சந்தையில் அதிர்வு ஏற்படும். தானியங்களின் விலை உயரும்; கால்நடை தீவனப் பற்றாக்குறை உருவாகும்; இறுதியில் உணவுப் பொருட்களின் விலை அனைத்து நாடுகளிலும் அதிகரிக்கும். இதன் தாக்கம் பணக்காரர்களை விட ஏழை மக்கள்மீதே அதிகமாக விழும்.

உணவு உற்பத்தி ஏற்கனவே உலக நாடுகளுக்கு பெரும் சவாலாக உள்ளது. கடுமையான எல் நினோ நிகழ்வு ஏற்பட்டால், உலகளாவிய உணவுப் பொருட்களின் விலை குறிப்பிடத்தக்க அளவில் உயரக்கூடும் என்று பொருளாதார நிபுணர்கள் எச்சரிக்கின்றனர். இது வெறும் புள்ளிவிவரம் அல்ல; கோடிக்கணக்கான மக்களின் அன்றாட வாழ்க்கையை நேரடியாகப் பாதிக்கும் உண்மை. குறைந்த வருமானம் கொண்ட குடும்பங்கள் தங்கள் வருமானத்தின் பெரும்பகுதியை உணவுக்காகவே செலவிடுகின்றன. எனவே உணவின் விலை உயர்வது ஊட்டச்சத்து குறைபாடு, குழந்தைகளின் வளர்ச்சி பாதிப்பு மற்றும் வறுமையின் தீவிரமடைதல் போன்ற சமூக விளைவுகளையும் ஏற்படுத்தும்.

இலங்கை போன்ற இறக்குமதியை அதிகம் நம்பியுள்ள நாடுகளுக்கு இந்த நிலைமை மேலும் சவாலானதாக இருக்கும். உலக சந்தையில் கோதுமை, பருப்பு, சமையல் எண்ணெய், உரம் மற்றும் எரிபொருளின் விலை உயர்ந்தால் அதன் தாக்கம் நேரடியாக இலங்கை மக்களின் வாழ்க்கையில் பிரதிபலிக்கும். குறிப்பாக வடக்கு மற்றும் கிழக்கில் வாழும் சிறு விவசாயிகள், மீனவர்கள் மற்றும் தினக்கூலி தொழிலாளர்கள் அதிகமாக பாதிக்கப்படுவார்கள். மழைப்பொழிவு சீர்குலைந்தால் பயிர் இழப்பு ஏற்படும்; வெப்பநிலை அதிகரித்தால் நீர்ப்பற்றாக்குறை மோசமடையும்; கடல் வெப்பநிலை உயர்ந்தால் மீன்பிடித் தொழிலும் பாதிக்கப்படும்.

எனவே காலநிலை மாற்றம் என்பது எதிர்கால சந்ததியினருக்கான ஒரு தொலைதூர பிரச்சினை அல்ல. அது ஏற்கனவே இலங்கை உள்ளிட்ட பல நாடுகளின் பொருளாதாரம், விவசாயம் மற்றும் மக்களின் வாழ்வாதாரத்தை பாதித்துக்கொண்டிருக்கும் நிகழ்கால நெருக்கடியாக மாறியுள்ளது.

இந்த நெருக்கடியை எதிர்கொள்ள உலக நாடுகள் உடனடி நடவடிக்கைகளை எடுக்க வேண்டியது அவசியம். புதைபடிவ எரிபொருட்களின் பயன்பாட்டைக் குறைத்து புதுப்பிக்கத்தக்க ஆற்றல் வளங்களுக்குத் துரிதமாக மாற வேண்டும். சூரிய மற்றும் காற்றாலை மின்சாரத்தில் முதலீட்டை அதிகரிக்க வேண்டும். வெள்ளத் தடுப்பு, நீர் மேலாண்மை மற்றும் வறட்சி எதிர்ப்பு கட்டமைப்புகளை வலுப்படுத்த வேண்டும். காலநிலை மாற்றத்திற்குத் தகுந்த புதிய விவசாய முறைகள் மற்றும் விதை வகைகளை உருவாக்க வேண்டும். காடுகளைப் பாதுகாத்து மரநடுகையை விரிவுபடுத்த வேண்டும். அதேசமயம், உலகளவில் உற்பத்தி செய்யப்படும் உணவில் பெரும் பகுதி வீணாகும் நிலையைத் தடுக்கவும் நடவடிக்கை எடுக்க வேண்டும்.

ஆனால் இந்தப் பிரச்சினையை வெறும் சுற்றுச்சூழல் விவகாரமாக மட்டும் பார்க்க முடியாது. இது பொருளாதாரம், உணவுப் பாதுகாப்பு, தொழிலாளர் வாழ்க்கை, சுகாதாரம், குடியேற்றம் மற்றும் உலக அரசியல் ஆகிய அனைத்துடனும் பின்னிப்பிணைந்துள்ளது. வெப்பநிலை உயர்வால் விவசாயம் பாதிக்கப்படுகிறது; விவசாயம் பாதிக்கப்படுவதால் உணவுப் பற்றாக்குறை உருவாகிறது; உணவுப் பற்றாக்குறை பணவீக்கத்தை அதிகரிக்கிறது; பணவீக்கம் சமூக அமைதியையும் அரசியல் நிலைத்தன்மையையும் பாதிக்கிறது. இதன் விளைவாக மக்கள் இடம்பெயர நேரிடுகிறது; புதிய மனிதாபிமான நெருக்கடிகளும் உருவாகின்றன.

பிரான்சின் காட்டுத்தீ, ஸ்பெயினின் வெப்ப அலை, பிரிட்டனின் கடுமையான வெப்பநிலை, ஆப்பிரிக்காவின் வறட்சி, ஆசியாவின் வெள்ளப்பெருக்கு—இவை அனைத்தும் ஒரே உலகளாவிய காலநிலை நெருக்கடியின் வெவ்வேறு முகங்களாகும். எல் நினோ இயற்கையின் ஒரு சுழற்சி என்றாலும், மனிதனால் உருவாக்கப்பட்ட காலநிலை மாற்றம் அதன் தாக்கத்தை மேலும் தீவிரப்படுத்தி வருகிறது. அதன் விளைவுகள் உலகளாவிய உணவுப் பாதுகாப்பு, பொருளாதாரம் மற்றும் மனித வாழ்வின் எதிர்காலத்தை ஆழமாகப் பாதிக்கக்கூடியவை.

எனவே, காலநிலை மாற்றம் குறித்து விஞ்ஞானிகள் விடுக்கும் எச்சரிக்கைகளை நாம் இனியும் புறக்கணிக்க முடியாது. இன்று எடுக்கப்படும் அரசியல், பொருளாதார மற்றும் சுற்றுச்சூழல் முடிவுகளே நாளைய உலகின் பாதுகாப்பையும் மனிதகுலத்தின் எதிர்காலத்தையும் தீர்மானிக்கும். இயற்கையை வெல்ல மனிதனால் முடியாது; ஆனால் இயற்கையுடன் சமநிலையுடன் வாழும் ஒரு நிலையான சமூகத்தை உருவாக்குவது நிச்சயமாக மனிதகுலத்தின் கைகளிலேயே உள்ளது.